မ၊ ၃၊ ၇၉-၈၆။ မ၊ မြန်၊ ၃၊ ၈၃-၉ဝ။ မ၊ ဋ္ဌ၊ ၄၊ ၆၂-၇။ မ၊ ဋီ၊ ၃၊ ၂၈၁-၆။

မဇ္စျိမနိကာယ၊ ဥပရိပဏ္ဏာသ၊ ၂-အနုပဒဝဂ္ဂ၊ ဒုတိယသုတ်။

ဘုရားရှင် ကောသလနိုင်ငံ သာဝတ္ထိမြို့ ဇေတဝန်ကျောင်းတော်၌ “ခီဏာဇာတိ၊ ဝုသိတံ ဗြဟ္မစရိယံ၊ ကတံ ကရဏီယံ၊ နာပရံ ဣတ္ထတ္ထာယာတိ ပဇာနာမိ”ဟု အရဟတ္တဖိုလ်၏ဂုဏ်ကျေးဇူး ၄ မျိုးဖြင့် ပြောဆိုလာသောရဟန်းကို (၁)တထာဂတဝေါဟာရ ၄ မျိုး၊ (၂)ဥပါဒါနက္ခန္ဓာ ၅ ပါး၊ (၃)ဓာတ် ၆ ပါး၊ (၄)အဇ္စျတ္တိကဗာဟိရာယတန ၆ ပါး၊ (၅-၆)အတ္တပရ သဝိညာဏကကာယ ဗဟိဒ္ဓသဗ္ဗနိမိတ္တတို့၌ အဟင်္ကာရ, မမင်္ကာရ, မာနာနုသယ သမူဟတဟူသော မေးမြန်းစိစစ်ချက် ၆ မျိုးတို့ဖြင့် မေးမြန်းစိစစ်၍ မှန်ကန်စွာ ဖြေဆိုနိုင်မှ ဝမ်းမြောက်ဝမ်းသာ ရဟန္တာဟု လက်ခံသင့်ပုံကို ရဟန်းတို့အား ဘုရားရှင် အကျယ်ဟောကြားတော်မူသည့်သုတ်။

ခီဏာသဝ၊ ဝုသိတဝန္တ၊ ကတကရဏီယ၊ သြဟိတဘာရ၊ အနုပ္ပတ္တသဒတ္ထ၊ ပရိက္ခီဏဘဝသံယောဇန၊ သမ္မဒညာဝိမုတ္တတို့သည် ရဟန္တာပုဂ္ဂိုလ်၏ဂုဏ်ပုဒ်များ ဖြစ်ပါသည်။ ဤသုတ်သည် ရဟန္တာဟုတ် မဟုတ် စိစစ်သည့်သုတ် ဖြစ်ပါသည်။

အဋ္ဌကထာ၊ ဋီကာတို့၌ ရဟန္တာဟုတ် မဟုတ် စိစစ်သော အခြားနည်းများနှင့်ပါဠိတော်လာ သိသင့်သောပုဒ်တို့၏အဓိပ္ပါယ်များကို ဖွင့်ပြထားပါသည်။

ကျမ်းညွှန်း

အရှင်ကုမာရထေရ် (မဟာသိမ်တော်ကြီးပရိယတ္တိစာသင်တိုက်ကြီး)၊ တိပိဋကသုတ္တသူစိကျမ်း(ဒု-တွဲ)၊ ပထမအကြိမ်၊ ၂ဝ၁၂၊ နိုဝင်ဘာလ၊ ယုံကြည်ချက်စာပေတိုက်၊ ၁၁၁၊ ၃၃-လမ်း၊ ရန်ကုန်မြို့၊ နှာ-၇၃-၄။